"إن قامتِ الساعةُ و في يدِ أحدِكم فسيلةً، فإن استطاعَ أن لا تقومَ حتى يغرِسَها فليغرِسْها."

حديث شريف

هدفنا نساعدك تزرع فسيلتك عن طريق البودكاست.

ابدأ، وسمّع العالَم صوتك.

المعنى،
مش المبلغ

في فسيلة، مش بندوّر على الفلوس قد ما بندوّر على المعنى من العمل الي بنقدّمه للنّاس. بنقدّم أعمال شايفين انها مفيدة وقيّمة للجمهور. بتضيف لحياتهم. الفسيلة الي هنزرعها مع بعض لازم تكون صالحة انها تُنبت مع الوقت ثمار طيّبة.

عشان دي شروط فضفاضة وممكن تختلف من شخص للتاني نحب اننا نتكلم معاك الأول ٣٠ دقيقة قبل ما نتكلم في تفاصيل الباقات والأسعار. قبل المكالمة، هتحتاج تملا الاستمارة الي احنا سايبينها لك تحت عشان تساعدنا نتعرّف أكثر على مشروعك وقيمته بالنسبة لجمهورك المنتظر. الأسئلة دي كمان هتساعدك ترسم ملامح تسويقية للمشروع لو مكنتش لسة عملت كدة. يعني مجرّد ملئ الاستمارة دي هيشدّك خطوة لقدّام من غير ما تحسّ.

الثمرة،

مش الرّبح

البودكاست وسيلة انك توصّل صوتك للي حابب يسمعه. بنشوف ان الإعلانات بتنقّص من تجربة المستمع. ومش حابّين نحطها في البودكاست الي بنساعدك تعمله. لأن ده يُناقض هدفنا الأساسي في ان المستمع يحصل على أفضل تجربة ممكنة.

وبالتالي، المصدر الأساسي للتربّح من البودكاست مش موجود. (وهو كدة كدة مبيجبش فلوس زي ما انت متخيّل، على الأقل مش بسرعة). رؤيتنا انك لو حابب تتربّح من البودكاست، هتحتاج تعمل كدة بقوّة محتواك، وبحلول مختلفة تقدّمها لجمهورك. زي خدمات إضافية أو منتجات بتاعتك وانت عارف انها مفيدة لجمهورك تسوّق لها عن طريق البودكاست بتاعك.

السّرعة،

مش الجودة

غيرك كتير انتظروا ومزرعوش الفسيلة الي في إيدهم متأمّلين انهم يطوّروها ويحسّنوها قبل ما يزرعوها. مأخدوش بالهم ان ممكن يزرعوا البذور دلوقتي، ويرعوها بعد كدة كلّ يوم فا تنمو أكثر وأكثر.

مش هنساعدك تنشر أفكار مش جاهزة عشان كدة هنبقى بنساعدك تزرع نبتة غير صالحة، وده هيضرّك أكثر ما ينفعك. لكن كتير مننا بيحكم ان فكرته لسة مش جاهزة وهي في منتهى الاستعداد انها تتزرع. تعرف منين؟

لو قدرت تملأ استمارة المعنى الي احنا عاملنها تبقى فكرتك جاهزة للنّشر. حتى لو متنشرتش عندنا، بس هتبقى عارف انك جاهز تسمّعها للعالَم وتعدّل وتحسّن فيها وانت ماشي. مش بس عشان ده حلمك. لكن عشان ده واجبك تجاه العالَم. انك تلبّي نداء هذا الحلم.